પતંગિયાનું ટોળું
મેં તો દીઠું પતંગિયાનું ટોળું
જાણે ઢોળાતું રંગનું કચોળું –
કચોળું-મેં તો ૦
ફરફરતા પાલવમાં
છૂપ્યું વાસંતી સ્મિત :
ઊડતી સૂરાવલિમાં
ગૂંથ્યું ગુલાબી ગીત.
બેઠું આંખે પારેવડું ભોળું
ભોળું-મેં તો ૦
ફૂલડાંના રંગ જાણે
ઓઢ્યા એણે અંગ અંગ;
પાંખોમાં પથરાયો
પ્રાણનો નવો ઉમંગ.
એના હૈયાને કેમ હું હીંચોળું ?
હીંચોળું-મેં તો ૦
ઇન્દુલાલ ગાંધી.
ટિપ્પણીઓ નથી:
ટિપ્પણી પોસ્ટ કરો