સંધ્યાનો પડછાયો
સંધ્યાનો પડછાયો
લાંબી લાંબી ડોક કરીને
છેવાડે છવરાયો
સંધ્યાનો પડછાયો.
વ્યોમબારણાં બંધ હતાં ને
તિમિર ઊભું’તું બ્હાર :
ગડથોલા ખાતું અજવાળું
ગયું આભની પાર.
રજનીનો પાલવ પૃથ્વીની
પાંપણ પર પથરાયો
સંધ્યાનો પડછાયો.
ચાંચ ક્ષિતિજની ખૂલી મહીંથી
નીકળ્યો રાતો રંગ
અંધકારમાં સૂર્યકિરણનું
ગયું ઓગળી અંગ.
તપી ગયેલી ધરતી ઉપર
શીતળ વાયુ વાયો
સંધ્યાનો પડછાયો.
ઇન્દુલાલ ગાંધી.
ટિપ્પણીઓ નથી:
ટિપ્પણી પોસ્ટ કરો